Laudioko EAJk jaien inguruan hausnartzeko beharra adierazi du. Batetik, San Roke festetako egitaraua Bilduren gobernu taldeak "aurretiaz Arloko Batzorde informatiboetan, oposizioko talde politikoekin landu gabe eta Jaien Herri Asanblada irekia baino lehen" diseinatu zuela salatu dute. Egitaraua aurrez diseinatua izan dutelakoan, borondate politiko falta egotzi diote jeltzaleek EH Bildu koalizioari. Bestetik, aisialdi eskaintzan adinarekiko desorekak egon direla azpimarratu dute: "Batez ere herriko bi sektoreengan: edadetuengan eta haurrengan". Era berean, adierazi dute ostalariengan ere, jai-ekimen batzuren kokapenak kezka eragin duela, eta ekitaldi hauek erdigunean egin zitezen eskatu zutela.
Jendearen parte hartzeari dagokionez, arrakastaren gakoa ez dela jaien antolakuntza ona izan adierazi dute: "Jai egitarauaren erakargarritasuna baino Bilboko Aste Nagusiarekin bat ez egitea baizik". Horregatik, Jaietako Batzorde Paritarioaren eredu parte-hartzailearen alde agertu da EAJ. "Sortu zenetik aktiboki parte hartu dugu. Parte hartze foro hau jai irekiago eta anitzagoa lortzeko egokia dela uste dugu. Horregatik, premiazko izaeraz berrhartzeko deialdia egiten dugu".
Egutegi aldaketaren eztabaida
Jaien data aldaketaz egutegiaren eztabaida ez duela saihestu nahi nabarmendu du EAJk, "beti ere modu lasaian, eraikitzailean, inposaketarik gabe eta pertsona zein gizarte kolektiboen parte hartze zabalarekin geiten baldin bada".