Euskararen erabilera sustatzeko aurten ere Euskal Jaia antolatu dute herriko hainbat eragilek. Aurreneko aldiz, gainera, egitaraua luzatu dute. Izan ere, ostiraletik igandera ekitaldi ezberdinak prestatu dituzte. Irailaren 26an, ostiralean, koplajira abiatuko da herriko plazatik. Ondoren, Uluka taldearen kontzertua egongo da Pio XII kalean.
Larunbatean izango da Euskararen eguna. 10:00etatik aurrera Laudioko ekoizleen azoka egongo da Pio XII kalean. 12:00etan, berriz, tuntturro joaldun taldekoek diana egingo dute. 12:30ean, aldiz, Nafarroa taldearen eskutik kantu-kalejira egingo da herrian zehar.
Antzinako auzoak, gune
Antzina bezala, herria lau gune edo auzotan bereiztuko dute: Goienuri (Herriko plaza), Larra (Alberto Acero kalea), Larrazabal (Zubiaur) eta Olarte (Zubiko). Gune bakoitzean ekintza ezberdinak egingo dituzte. Horietako bakoitzean herri bazkari bana egongo da, 10 euroren truke. Goienuri gunean haurrentzako herri kiriolak egingo dituzte, Larran bideo festa, Larrazabalen perkusio ikastaroa eta Olarten bertso-hop saioan. Alkatearen hautaketa 19:00etan izango da herriko plazan. Segidan, Oskizola taldearekin dantza-plaza egongo da. Euskararen aldeko festa iluntzerarte luzatuko da, 21:00etan kantu-kalejira abiatuko baita kalez kale. Gauean Izargi taldearekin erromeria egingo dute.
Cup-song grabaketa
Aiaraldea Komunikazio Leihoaren gunea Larra izango da. Hots, Alberto Acero kalea. Ikus-entzunezkoen bidez euskara zabaldu eta sustatzeko "cup-song" bat egitea izango da erronka. Alegia, edalontziekin egiten den perkusio dantza. Horretarako, koreografia azaltzen duen bideoa zabaldu dute. Grabaketa 17:00etan egingo dute, herritar orok parte hartzeko aukera izan dezan. Igandean bukatuko da euskararen aldeo jaia, herriko plazan udal musika bandak eskainiko duen kontzertuarekin.