Bilduren udal-gobernuak Tokiko Gobernu Batzarraren erabilera "maltzur eta makurra" egiten duela salatu du EAJko udal-taldeak. Tokiko Gobernu Batzarrean egondako ordezkapen baten harira egin dituzte adierazpenak. Bilduren gobernu-taldeak Maider Basterra Ibarretxe zinegotzi jeltzalea Bilduko Koldo Zabala Atxa zinegotziagatik ordezkatzea erabaki du, 1983ko alkatetza dekretu baten bidez.
EAJk 2013ko maiatzetik darama Tokiko Gobernu Batzarrean parte hartu gabe. Jeltzaleek bi arrazoiengatik utzi zioten batzar horretan parte hartzeari, euren hitzetan.
Lehen arrazoia: sarritan batzar horretan onartuak izateko puntu garrantzitsuak aurretiaz inolako txosten edo informaziorik eman gabe aurkezten zirela.
Bigarren arrazoia: Bilduk demokraziaren kontzeptu “lizun” bat baliatu duela batzar horietan. Izan ere, jeltzaleek salatutakoaren arabera, Bilduk batzarrean puntu bat aurkezten zuenean eta gehiengoa ez zuela ikusten zuenean puntua beste bilera batean bozkatua izateko gai ordenetik kentzen zuen.
Bilduren erantzuna
EAJk egindako adierazpenen harira, Bilduren udal gobernuak gogorarazi du EAJko zinegotziek 2013ko maiatzetik daramatzatela “astero-astero” egiten den batzar horretara azaldu gabe.
Udal gobernuko kideek adierazi dute abuztuan EAJko taldearekin harremanetan jarri zirela, gobernu-batzarrera bertaratzen ez baziren euren ordezkarietako bat Bilduko ordezkari batengatik ordezkatuko zutela jakinarazteko. Dena dela, gobernu taldetik azpimarratu dute EAJko kideak edozein momentutan itzuli daitezkeela gobernu-batzarrera, hala nahi badute, eta gogorarazi dute alkatearen eskumena dela tokiko gobernu batzarrean parte hartzen duten pertsonak izendatzea.
Hortaz gain, Bildutik adierazi dute “gezur hutsa” dela EAJk egindako salaketa. Gobernu taldeko kideen hitzetan, behin baino ez da gertatu puntu bat gai ordenetik kentzea, eta oso bestelako arrazoi batengatik izan zela gaineratu dute. “Aktetan begiratzea baino ez dago”, ziurtatu dute Bilduko zinegotziek.