Laudioko Lamuza Multzoko Urbanizazio Obra-Lanen lehen fasea onartu da azken Udal Osoko bilkuran. Lehen fase horretan Aldaikoerrekako erreka zatiaren saneamendu sarea berreskuratzea aurreikusten da, Koldo Zabala zinegotziak azaldutakoaren arabera.
Erreka Lamuza Parkea zeharkatu eta Lamuza plazara iristean lurpean sartzen da, gero Nerbioi ibaian sartzeko. Errekaren saneamendu sarea, baina, aspaldidanik izorratua dago. Horrek hainbat arazo sortzen ditu: ur fekalak noizbehinka errekan isurtzea edota uda partean erreka ur korronterik gabe geratzea eta, ondorioz, usain txarrak hedatzea.
Zabalak azaldu du jatorrizko proiektua Arabako Foru Aldundiak egingo zuela eta 3 milioi euroko aurrekontua zuela, “PP 2011an diputazioan sartu zenean, baina, partida hori kendu egin zen”. Gauzak hala, beste finantziazio bide bat bilatu behar izan zuen Udalak eta, foru planaren bidez herriko bi obra finantzatu zitzakeela ikusirik, Lamuza multzoko lehen fasearena plan horren bidez finantzatzea erabaki zuen, 1.29 milioi euroko aurrekontuarekin. Zabalak salatu du “Aldundiaren utzikeriagatik” sartu behar izan zutela obra foru planaren baitan, “Aldundiak berez egin behar zuen proiektu bat delako”. Hortaz gain, zinegotziak gaineratu du jatorrizko proiektuan Lamuza Parkeko Kasinoaren eta Musika Etxearen eta Ugarteko dorretxearen emergentzia plana ere sartzen zirela.
Behin lehen fasea plan horren baitan sartuta, obren kostuaren zati bat bere gain hartu beharko du udalak. Zabalak Osoko Bilkuran zehaztutakoaren arabera, udalak %10a ordaindu beharko du. Gainontzeko %90a Foru Aldundiaren esku geratuko da.
2015ean hasi
Proiektuaren lehen fasea OMNIA, PSE-EE, PP eta BILDUren botoekin onartu zen. EAJ abstenitu egin zen, proiektuarekin ados egon arren, dokumentazio tekniko gehiago jasotzea gustatuko litzaiokeelako. Lehen fasea onartuta, udazkenean pleguen prestaketarekin hasiko direla aurreratu du Zabalak, eta gaineratu du obraren esleipena datorren urtearen hasieran egitea espero dutela, eta jarraian obrei ekitea.