Untzueta Dantza Taldeari esker Berakatz Eguna galdu ez den jaia da. 1997. urtean berreskuratu zuten ohitura koadrilen eta ezagunen laguntzaren bitartez eta osasun handiko ospakizuna da egun. Erlijiotik urrun sortutako jaia da Berakatz Eguna.
Jaien ostean ospatzen zen -gaur ez bezala- eta berakatz zopa bazkaltzen zuten Laudioko herritarrek gehiegikerien zantzuak ezabatzeko, Felix Mugurutza historialariaren hitzetan. Historialariak azaldu du “herritarren jai “askeena” zela eta gazteen jai-nahi aseezina hobekien biltzen zuena. Gainera, Laudion, markesaren jauregiko zerbitzarien -neskena batez ere- eguna zen: jaia ematen zieten eta Sanrokeak ospatzeko zuten egun bakarra
Moldaketak
Ohitura, hala ere, apurka-apurka galduz joan zen XX. mendeko 60. hamarkadan. Arantza Sautua Untzueta Dantza Taldeko kideak azaldu du jaia berreskuratu ez ezik, moldatu dutela; aspaldi jaian egiten den soka eta aurreskua mutilek gidatzen bazuten, nesken esku ere geratu da. Ardura hori tartekatzen dute: urte batzuetan mutilak, besteetan neskak buru direlarik.
Egindako beste moldaketa da astotxoaren kalejira. Antzina zabor biltzaile bakarra zegoen herrian eta bere jaieguna Kofradiaren egunaren ostean zen. Egun horretan astoa eta gurdia apaindurik, txistulariekin eta festazaleekin ateratzen zen herritik ospatzera.