“Ardi beltza artaldea jarraitzeaz aspertua dago. Bere bidea hastea erabaki du eta Laudion gauzak alda daitezen eragitea”. Hala aurkeztu du bere burua Ardi Beltza egitasmoak, Laudioko jaietan banatutako kartel eta pegatinen bidez.
Egitasmoko kideek “gauzak egiteko beste modu bat” dagoela uste dute, eta euren iritzia kontuan hartu dadila eta euren ahotsa entzun dadila nahi dute. “Laudioko biztanleek azpiegiturez, zerbitzuez... gozatzeko eskubidea” dutela aldarrikatu dute herrian zehar jarritako karteletan, eta gaineratu dute ez dela “lan erraza” izango, baina “guztien artean” lor dezaketela.
Jai-koadrilen artean banatutako pegatinetan, berriz, salaketa mezu zehatzago bat helarazi dute: “Zuzenbide master bat izan behar da diru-laguntzak eskatu ahal izateko?”.
Bukatzeko, galdera bat helarazi diete herritarrei: “Zu ere ardi beltza zara?”. Galderarekin batera, eurekin kontaktuan jartzeko sare sozialak aipatu dituzte. Facebooken (Laudio Ardi Beltz) eta Twiterren (@LaudioArdiBeltz) dituzte kontuak. Laster egitasmoaren inguruko informazio gehiago zabalduko dutela adierazi dute.