IDOIA TEMPRANO RUIZ (1963, Laudio) Kilkerrak koadrilakoa da. Baserritar Eguneko azoka antolatuko dute koadrilako kideek.
Tradizio handikoa da Baserritar Eguneko azoka. Zein da tradizioaren jatorria?
Jatorria ez nizuke zehazten jakingo. Iazkoa guk azoka antolatu genuen 25. aldia izan zen, baina gu baino lehen beste koadrila batek antolatzen zuen. Antolakuntza gure gain hartu genuenean koadrila horrek 6-7 urte zeramatzan jada antolaketan.
Zer nolako bilakaera izan du azokak?
Antolaketa aldetik “sota-zaldi-errege” izan da beti. Bilakaerarik egotekotan postuen nolakotasunetan egon da. Orain dela 25 urte postu gutxiago zeuden eta baserri eta artisautza munduak presentzia handiagoa zeukan. Azken urte hauetan gaztagintzak eta euskal pastelak protagonismo gehiago hartu dute, eta artisautzak ere nabarmen egin du gora.
Koadrilen Egunaren osteko goiza izanda, zer da nagusi azokan, jende nagusia edo gazte gaupaseroak?
Denetarik. Gehiena egia da jende nagusia dela, baina badaude koadriletako gazteak ere. Horrek asko harritzen gaitu: aurreko eguna koadrilena izanda eta oraindik asteburu osoa igarotzeke egonda jende gaztea azaltzea.
Eta zer egiten dute herritarrek azokan gehiago, ikusi edo gosaldu?
Jende nagusiak badu ortuko produktuak, euskal pastela edota gazta erostera joateko joera. Gazteagoek, berriz, talora edo aurten egingo ez dugun txakoli eta sagardo dastaketara zuzentzen dira gehiago.