1976. urtea da. Laudioko Rakatapla koadrilako zortzi kide Logroñoko San Mateotan daude, eta ez nagikerietan, Txuletilla Txapelketan parte hartzen baizik. Norgehiagoka horren funtsa sinplea da: txuletilla gehien jaten dituenak irabazten du. Bertan parte hartzeak, baina, ez die laudioarrei jateko gogoa kendu. Herrira itzuli direnerako badute ideia buruan: “zergatik ez dugu Laudion halakorik antolatzen?”.
Hasierako ideia hartatik gauzatu zena ez zen Logroñokoa bezain txapelketa basatia izan. Gastronomi lehiaketa “klasikoago” bat antolatu zuten Rakataplakoek: Untxi eta Tortilla txapelketa. 1977ko lehen edizioan Rakataplako lau kidek parte hartu behar izan zuten, parte-hartzaile baino sari gehiago baitzeuden, baina txapelketak “pixkana-pixkanaka” garrantzi handiago hartu zuen, gaur egun arte.
Guiness errekorra
Gastronomi Lehiaketak parte hartze handia duela eztabaidaezina da. 2003. urteko edizioan argi ikusi zen: 350 tortilla eta beste horrenbeste untxi aurkeztu ziren, Guiness errekorra gainditzeko behar adina. “Tamalez, notarioa eta telebista ez ziren bertaratu”, oroitu du Rakataplako kide den Ekhiotz Bilbaok, “eta horregatik marka-haustea ez zen ofizialki jaso”.
Untxi txapelketa jaien baitan egiten bazen ere, azken urteetan jaien bi zatien arteko larunbatean egin izan dute. “Gure lehentasuna larunbatetan egitea da, bestela jende askok ezin du parte hartu, lan kontuak direla eta”.
Larunbatean, abuztuak 23 ospatuko da 36. edizioa
San Roke jaietako etenaldian ospatuko da aurtengo Gastronomi Lehiaketa. Parte-hartzaileek goizeko 8etatik aurrera hartu ahal izango dute euren lekua Zumalakarregi etorbidean, eta ohi bezala, izen-ematea doakoa izango da.