Diru eta zekor gutxiago. Hori da duela bi urtetik hona Laudioko Jaien zezenketetan egon den aldaketa. Lehen Mazantini elkarteak udalari zezenketak antolatzen laguntzen zion, baina iaz udalak enpresa bat kontratatu zuen zezenketak antolatzeko, eta aurten ere hala egingo du.
Zezenketen antolakuntzan egondako aldaketa hori udalak ezer arriskatzea ekiditeko egin zela argudiatu du Fontso Larrazabal kultura zinegotziak, “zezenketak udalak antolatzen zituenean erantzukizuna udalarena zen zerbait gertatuz gero”, azaldu du. PSEk eta PPk, baina, gogor kritikatu zuten bere garaian aldaketa, eta zezenketen “pribatizazioa” zela esatera iritsi ziren.
Polemikak polemika, argi dagoena zera da: oraingo sistemarekin zezenketen kostua asko murriztu dela. Larrazabalen hitzetan, udalak antolatzen zituenean zezenketek 45.000 euro inguruko kostua suposatzen zuten, baina zinegotziak gaineratu du 10.000 euro inguru sarrerak salduz berreskuratzen zirela. 35.000 euro inguruko kostua, beraz. Enpresak aurkezten duen faktura, berriz, 16.000 euro ingurukoa da.
Baina merketze horren arrazoia ere argia da: zekor gutxiago hiltzen direla. Lehengo sistemarekin hiru zezenketa egiten ziren, eta lau zezen hiltzen ziren bakoitzean. Orain bi zezenketa egiten dira soilik, eta horietako bat errekortadoreena da. Sei zezen hiltzen dira guztira, lehen hiltzen zirenen erdia.