Ski-taula, kantzontzilo eta kulero lasterketa... ugariak dira Laudioko Jaietan egiten diren txapelketak, zein baino zen bitxiagoa. Baina norgehiagoka ohikoagoak ere topatu daitezke San Roketan, dantza lehiaketak kasu.
Lehiaketa bakarrarekin aski ez, eta hiru lehiaketa prestatu ditu Fita Fik Euskal Musika Tresna Eskolak, abuztuaren 16rako: arratsaldeko seietan aurresku lehiaketa egingo dute. Handik ordu betera, berriz, fandango eta arin-arin txapelketek hartuko dute lekukoa. Hirurak Herriko Plazan egingo dituzte.
Aurtengoa hiru lehiaketa horien 17. edizioa izango da, Fita Fik-eko kide den Mikel Barrosen hitzetan. Eskolak 15 urte daramatza txapelketa horiek antolatzen, lehenbiziko bi edizioak norbanako edo koadrila bateko kideen artean antolatu baitzituzten, Barrosen hitzetan.
Parte-hartzaile aldetik nahiko lehiaketa jendetsuak izan ohi direla adierazi du Fita Fik-eko kideak, “ez da hamar parte-hartzailetatik jaisten”. Herriko jendeaz gain, kanpoko dantzariak ere bertaratu ohi direla azpimarratu du Barrosek.
Kultur jaia
Dantza lehiaketak antolatzeaz gain, beste ekimen bat ere egingo dute Fita Fik-ekoek jaietan: kultur jaia. Baserritar egunean izango da, arratsaldean. Eskolako kideak beste musika elkarte batzuetako kideekin arituko dira kalejiran, “herria girotzeko”.