Aretako Jaien biharamunean hitzartu gara haiekin. Aurreko eguneko parrandaren zantzu nabarmenekin azaldu dira zitara, baina horrek ez die elkarrizketa modu umoretsu batean gauzatzea galarazi. Zoroak Inkultur Taldea denaren lagin bat baino ez dira Jebi Vales, Antxoka Goitia eta Uztai Largatza, baina ondo irudikatzen dute koadrila horrek duen belaunaldi nahasketa.
Aurten badute zer ospatu Zoroakeko kideek, 30 urte bete baitituzte. Taldea, berez 1983an sortu zela azaldu du Valesek, “Alaiak koadrila zenaren ‘eszisio’ moduko bat izan zen”. Hasierako ideia taldeari “Tximeletak” deitzea zela oroitu du Valesek.
Hala ere, izen hori jartzea oso aproposa ez zela konturatu ziren gero, eta hala aldatu zuten “Zoroak” izena. Koadrilaren ikurra, baina, tximeleta bat izaten jarraitzen du, hasierako garaiei leial.
Txerri jasotzea patinetan
Ugariak dira Zoroak-eko kideek koadrilaren historian zehar antolatu dituzten ekintzak: txerri bilketa patinetan eta Koadrilen Eguna antolatzen hasi ziren. Gaur egun, berriz, Zoroak Extreme “muturreko herri kirolen txapelketa” da haien ekintza izarra.
Txupinero izatearen aukera pozik hartu dutela azaldu du Antxoka Goitiak, nahiz eta oraindik ez duten erabaki suziria zerura, Udaletxe barrura edo plazako jendearengana zuzenduko duten. Eta bai, aukera ikusten dute beste 30 urtez jaietan “osasuntsu” aritzeko.