PEDRO ADRIAN (Laudio, 1968) Musika Bandaren zuzendaria da. San Roke musika elkarteko kideak dira aurtengo pregoilariak.
Aurten pregoilariak zarete, zer nolako sentsazioa duzue?
Poz handia. Pasa den urtean ia lortu genuen, duela bi ere bai. Gainera herritarrek proposatzen dute eta Udalak erabakitzen du, beraz, esan bezala, oso pozik.
Jaietan bandak bere protagonismoa du, nahiz eta pregoilaria ez izan. Aurten zenbat kontzertu emango dituzue?
Aurten 3 kontzertu, txupina, pregoia, zezenketan ere egongo gara eta bi edo hiru kalejira egingo ditugu.
Orduan jaietan denbora gutxi izango duzue zuentzat.
Bueno, umea nintzenean gogoratzen dut egiten genuela egunean bertan alborada, kalejira, saioa, kontzertua eta zezenketa. Hori lau egunetan zehar eta gero lau kalejira gehiago. Eta gainera Areta, Gardea, Ugarte eta Latiorrora joaten ginen kamioi batean edo autobusean kalejirak eskaintzera eta hori goizean.
Eta pregoia nolakoa izango da?
Protagonista musika izango da. Pregoia idatzi dut baina ez dakit hainbeste irakurtzeko gai izango naizen eta musikariak izanik guk nahiago dugu musika egin. 3 edo 4 abesti joko ditugu.
Bandaren historia ere landuko dugu, kiderik zaharrenak ere irakurriko du eta agurtzeko agian bandako ume batek ere irakurriko du.
Eta historian zehar gertatutako pasadizoren bat duzue bereziki gogoko?
(barreak) Pasadizo ugari bizi izan dira bandak dituen ia 100 urte hauetan, baina ez dira inori kontatzeko.