“Jaiak herritik eta herriarentzat” lema helburu hartuz aritu dira lanean Jaiak Koordinakundea eta Txosna Batzordea, urte osoan zehar. Jaietan iritsiko da egindako lan guzti hori ikusteko unea.
Jaiak Koordinakundean 20 koadrila aritu izan dira elkarlanean, eta horren fruitu dira abuztuaren 15etatik 31ra bitarte egingo dituzten ekintzak, guztira 25 inguru izango direnak. Jaiak Koordinakundeak, gainera, ez du bere jarduna San rokeetara mugatzen, Inauterien eta Sanpedropekoen antolakuntza ere bere gain hartzen baitute bertan dauden koadrilek.
Txosna Batzordeak, bere aldetik, musika eskaintza zabala aurkeztu du aurtengo jaietarako, eta bertoko ekoizleak sustatzeko helburua ere hartu du. Hala, Euskal Herrian egindako garagardoa dastatzeko aukera egongo da Txosnagunean, eta bokatak egiteko tokiko ekoizleen produktuak erabiliko dituztela aurreratu dute Batzordetik.
Pausoak emateke
Jaietan dagoen parte-hartzea “mantendu” egin dela adierazi dute Txosna Batzordeko eta Jaiak Koordinakundeko kideek, baina jaiei begira azaldu dute ez direla “behar izango litzatekeen bezain parte-hartzaileak”.
Alde horretatik oraindik pausoak eman behar dira, euren hitzetan. Ereduak egon badaudela ziurtatu dute: “Areta edo Latiorroko jaiak, esaterako”. Bide horretan “fase berri bat” irekitzeko beharra adierazi dute, “eta horretarako beharrezkoa da jendearen inplikazioa”.