Laudioko Tokiko Garapen Agentziak ekintzaileen 52 kontsulta jaso ditu 2014 urtearen lehen seihilekoan, ia 2013 urte osoan jasotako kopuru bera. Iñigo Martinez Cerrillok, funtzio publikorako zinegotziak, ekintzaile laudioarren profilaren azterketa eskaini berri du datu hauei erreparatuta.
Ekintzaile gazteak
Jaso diren eskaerak aztertuta, hirutik bat 30 urtetik beherakoek egindakoa dela azpimarratu zuen Bilduko zinegotziak. 2014an hurbildutakoen %43a emakumezkoak izan dira bestetik. 2013an bezala, kasu gehienetan merkataritza, ostalaritza eta zerbitzuekin lotutako negozio txikiak abiatzeko ekimenak azaldu dituzte informazio eta laguntza eske hurbildutakoek.
Izan ere Laudioko Garapen Agentziak 2014an egindako 10 kontsultari bideragarritasun plana eskaini die. Negozio hauek abiatzeko batez besteko inbertsioa 22.798 eurotan kokatu da, 2013an berriz, JEZn, Jarduera Ekonomikoen gaineko Zergan, alta eman zuten 17 ekimenen batez besteko inbertsioa 28.000 eurotakoa izan zen.
Aurten aztertu diren ekimenen artean, besteak beste, atzarien muntaketa, autoen garbiketa, irudi eta soinua, garraioa, belar-denda, arraindegia, segurtasun ingenieritza, taberna eta artisautzarekin lotutako negozioak azaldu dira.
Merkataritzaren mapa birtuala
Laudioko Tokiko Garapen Agentziak herriko merkataritzaren informazio geografikoa eskainiko duen sistema sortzeko ekimena garatuko du. Eusko Jaurlaritzako Merkataritza eta Turismo Sailburuordetzak eskainitako diru-laguntzaz baliatuta, erreminta berriak herriko merkatari eta ekintzaileei zein Udalari berari sektoreari buruzko informazio eguneratua eskainiko die.
Hortaz, herriko jarduera ekonomikoari buruzko kontsulta anitzak egiteko tresna sortuko da, merkataritza arloko eskaintza ezberdinen eraginkortasuna, gabezi edo berrikuntzak lantzea ahalbidetuko duena. Informazio horren hartzaileak merkatariak eta ekintzaileak izango dira eta Udalak ere tresna baliagarria izango du bere egitasmoen garapenean, plangintza urbanistikoak kasu.
Ekimena irailean abiatuko da datu bilketa fase batekin eta urte amaierarako aplikazio informatikoa martxan egotea espero da.