Laudioko Udalak aurtengo jaien egitaraua aurkeztu du. Bi txandatan banatuko dira jaiak, abuztuaren 15,16 eta 17an alde batetik eta abuztuaren 27, 28, 29, 30 eta 31 bestetik. Gainera, Fontso Larrazabal zinegotziak gogoratu du abuztuaren 14an San Roke Musika Elkarteak pregoia irakurriko duela arratsaldean Herriko Plazan eta abuztuaren 23an txapelketa gastronomikoa egingo dute.
Larrazabalek azaldu du udalaren apustua kontinuista dela, aurreko urteetan Batzorde Paritarioarekin jarraitutako irizpideak erabili baitira. Zentzu horretan, musika ugari entzungo da jaietan. Abuztuaren 16an O´Funkillo taldeak joko du txosnetan eta 29an Doctor Deseo, Zumalakarregi etorbidean.
10 berbena eta erromeria antolatu dituzte, 5 kontzertu, 7 Diskodantza eta gainera abuztuaren 31n Korrontzik dantzarekin lotuta dagoen ikuskizuna eskainiko du.
9 antzezlan ere egongo dira herriko txoko ezberdinetan; Aldai Plazan, Herriko Plazan, Parkean... Batzuek helduak dituzte helburu eta bat gutxienez umeentzat izango da.
Jai guneak
Zumalakarregi etorbidea itxiko da jai-egunetan eta ardatza izango da, hainbat puntutatik zabalduko baita jaia: Herriko Plazan aurresku txapelketa egingo da, Lamuza Parkean umeentzako ekintzak, Abasto Plazan nagusientzako berbenak, txosnetan hainbat kontzertu...
Ohiko hainbat ekitaldi egingo dira -koadrilek antolaturik, adibidez- eta herri-kirolak, txirrindula lasterketa, dantzaldiak, hockey partidak, gastronomia eta kalejirak gogoko dituenak aukerak izango ditu parte hartzeko.
8000 egitarau
Aplikazioa egin ez ezik, 8000 egitarau banatuko dituzte. Laudioko Udalak taldeen laguntza eta iradokizunak eskertu ditu eta jaiak gozatzeko deialdia egin du.