Oraindik denbora falta da Latiorroko Jaiak hasi daitezen. Irailaren 19tik 21era bitartean izango baitira. Baina auzoko jai-batzordeko kideek lotuak dituzte jada egitarauko hainbat gauza.
Kontzertuen aldetik, Kaotiko, Txapelpunk eta Garilak 26 taldeek joko dutela aurreratu dute jai-batzordetik. Irailaren 19an joko du Kaotikok (herriko DJekin batera). Hurrengo egunean izango da Txapelpunk taldearen eta Garilak 26 erromeriaren txanda.
Ekintza gehiago
Latiorroko jaien egitaraua ez da kontzertuak eskaintzera mugatuko, beste hainbat ekintza gehiago egingo dituztela jakinarazi baitute jai batzordetik. Irailaren 19an danborrada egongo da, 18:30etan. Handik ordu erdira piztuko da jaien hasierako suziria. Pintxo-potea eta umeentzako antzerkia egongo dira gero.
Larunbatean, berriz, mendi martxaren eta umeentzako puzgarri eta tailerren txanda iritsiko da. Herri bazkaria egongo da gero, eta arratsalde partea mus txapelketan parte hartzeko eta zaldi probak ikusteko aukera izango dute auzora bertaratzen direnek.
Igandean marmitako lehiaketaren XXV. edizioak hartuko du protagonismoa, eta arratsalde partean herri bingoa ere egongo da.
Horretaz gain, jai-batzordetik azpimarratu dute oraindik beste hainbat ekintza dituztela konfirmatzeke.