Laudioko Batzoki zaharra kokatzen zen orubea denbora luzea darama inolako erabilerarik gabe. Orain, Udalak bertan zegoen azken eraikina eraitsi eta gero, Laudio Berri SL, gunearen jabea den enpresak, akordioa sinatu du erabilera publikoa izan dezan.
Udalak ez du ezer ordainduko. Baldintza bakarra, zer edo zer eraikitzeko aukera suertatzen den momentuan, erabilera publikoko epea amaitzea eta Laudio Berrik bere hirigintza-eskubideak baliatu ahal izatea da. Enpresak hilabete bateko aurrerapenarekin jakinarazi beharko du.
Udalak eskerrak eman dizkio Laudio Berriri zabaldu duen aukera honengatik. Izan ere, erabilera behin behinekoa izanik ere, espazio hau oso probetxugarria izan daiteke, duen kokapena eta zabaleragatik.
Alberto Aceroko Orubearen erabilera zehatzari dagokionez, Udal Gobernuak baditu ideia batzuk eta datorren astelehenean, uztailak 21, gainontzeko udal taldeekin eztabaidatuko ditu azken erabakia hartzeko.
Orubea egokitzeko lanak laster hasiko dira. Gunea aldi baterako erabiliko dela kontuan izanik, Udalak elementu desmuntagarriak eta herriko beste gune batzuetara eraman ahal izango direnak baliatuko ditu eta lur-zorua ez da asfaltatuko.