Laudioko kale nagusiko argiteriak 30 urte baino gehiago du. Laudiar askok ez dute bestelako farolik ezagutu. Zumalakarregi osoko argiteria aldatzea erabaki du Udalak, Anbulatoriotik Eroskiko errotondaraino. Arrazoi nagusiak bi dira: dauden argiek dakartzaten gehiegizko kontsumoa eta gaur egungo sistema berriekin konparatuz, ematen duten argiztapen eskasa. Zumalakarregi kale komertziala izanik, Laudioko dendari eta merkatariek behin baino gehiagotan nabarmendu dute argiztapen hobe baten beharra.
Jarriko den argiteria berria LED sistemakoa izango da, sistema berri honekin energia kontsumoa %50 gutxiago izatea espero da.
Gaur egun bi argi dituzte Zumalakarregiko farola gehienek, goiko aldean bat eta farolaren erdiko aldean bestea. Argiteria bikoitz honen beharra Zumalakarregin zeuden katalpa zuhaitzek ekartzen zuten neurri handi batean. Zuhaitzak hain hostotsuak izanik, espaloiaren argiztapena zailtzen zuten. Katalpa zuhaitz ugari ordezkatu dira, ordea, eta farola berri gehienek bonbila bakarra izango dute beraz.
Hurrengo lehentasuna: Pio XII
2014ko aurrekontuetan 82.000 euroko gastua aurreikusita dago argiterian. Zumalakarregiko instalazioa egin eta gero, soberakina izatekotan, Pio XII kaleko argiteria aldatzeko erabiliko du Udalak, kale hau komertziala izanik, merkatariek bere argiztapena ere hobetzea eskatu dutelako.
Hiru enpresa desberdinei eskatuko zaie argiteriaren hornikuntzarako proposamena eta hobea dena aukeratuko du Udalak. Argien instalazioa, berriz, udal langileek egingo dute.