Laudioko Udalak udaltzainen erretiro adina 60 urtetan ezartzearen alde egingo du. Xede honekin ELA sindikatuak azken Udalbatzan, ekainaren 30ean, aurkeztutako mozioak Bildu, EAJ eta PPren aldeko boza eskuratu zituen. PSEk eta Omniak berriz, aurkako boza eman zuten.
Hortaz, Udaleko ELAko atal sindikalak aurkeztutako mozioak Euskal Polizia Legeak Ertzaintzari zein eta euskal udaltzaingoari izaera berdina aitortura, 60 urterekin erretiroa hartzeko aukera Ertzaintzak soilik aitortuta duela azaltzen zuen.
Izan ere hiru akordio biltzen zituen mozioak. Batetik Udala bera udaltzainen erretiro adina aurreratzearen alde azaltzea. Bestetik, Udalak Eusko Jaurlaritzari Espainiako gobernua interpela dezala eskatzea, xede honekin legea egokitu dezan eta, azkenik, Eudel eta Udalbiltza udalen elkarteei ekimenean inplika daitezen eskatzea proposatzen zuen mozioak.
Bozketan Bilduko Josu Zabalak aitortza berbera merezi duten beste hainbat lanbide badela gaineratu zuen bere taldearen baiezko jarrera azaltzean. PSEk berriz, mozioaren edukiarekin bat etorrita ere, Eusko Jaurlaritza beharrean zuzenean Espainiako gobernuari zuzendu ez izana agertu zuen aurkako boza arrazoitzerakoan. Omniak azkenik bere web orrian jasotako erantzunetan oinarritu zuen ezezkoa.
55 urtetik gorako 12 udaltzain 2019rako
ELAk mozioan azaldutako datuen arabera, bost urteren bueltan Laudioko lau udaltzain 60 eta 65 adin tartean egongo dira eta beste zortzi 55 eta 59 adin tartean. 2019 urtea bitartean sortuko den egoera honi lotutako hausnarketa eskaintzen zuen mozioan sindikatu abertzaleak “aurre jubilazio honen helburua inoiz ezin da izan lanpostuen amortizazioa, eta lanpostu horrek duina, egonkorra eta kalitatezkoa behako luke izan”. “Langileen gaztetzea ere ahalbietuko luke, instituzioek langile aktiboagoak izango lituzkete eta honek, herritarrei eskaintzen zaien zerbitzua hobetzea ekarriko luke” argudiatzen zuen mozioak.