Astelehenean egindako udalbatzan onartu zuten txakurren aisialdirako guneak sortzeko mozioa. Mozioa Omnia eta EAJ taldeek aurkeztu zuten baina Iker Castellote txakur trebatzaileak sustatu zuen. Herritarrak azaldu zuen 1995. urteko araudiak muga ugari jartzen diela txakurrei -lotuta joatea, adibidez- eta horren ondorioz txakurrak izatea gatazkatsua izan daitekeela.
Castelloteren ustez animaliek ariketa fisikoa egitea behar dute eta aukera hori izan ezean portaera erasokorrak izan ditzakete. Hori dela eta txakurrentzako aisialdi guneak sortzea proposatu zuen. Ez bakarrik animalien mesederako -elkar ezagutzeko eta borrokak ekiditzeko, adibidez-, baita txakurrak gogoko ez dutenek lasaiago egon daitezen. Txakurrak leku horietan bakarrik egongo lirateke aske eta.
Omnia eta EAJ taldeek Castelloteren eskaera babestu zuten eta txakurrei zein jabeei alternatiba eskaini behar zaiela berretsi zuten. PP, PSE-EE eta Bildu abstenitu ziren. PPk gogoratu zuen txakurren gorotzekin dauden arazoak eta sozialistek zein Bilduko bozeramaleak kezkak adierazi zituzten. Txaro Sarasuaren ustez ez dago lekurik auzo guztietan horrelako azpiegiturak irekitzeko. Koldo Zabalak horrelako proiektua finantzatzeko diru-sailarik ez dagoela jasota aurrekontuetan esan zuen.