Substantziekin lotutako menpekotasunak bakarrik ez, bideojoko edo apustuek sortarazten dituztenak ere jorratuko ditu ikerketa honek. Berritzailea izango da zentzu horretan, orain arte drogomenpekotasunetan oinarritu baitira Laudion egin diren planak. Diagnostiko honen ondorioekin lan ildo berriak zehaztea espero du Udalak.
Txari Balado zinegotziak azaldu duenez, hurrengoa izango da lan metodologia: Lehenengo eta behin egungo lege testuingurua aztertuko da eta orain arte egin diren ekimen eta plan guztiak jasoko dira. Gero hainbat agenteekin elkarrizketak egingo dira: Laudioko elkarteetako kideak, udal teknikariak, ikastetxeetan lan egiten duten hezitzaileak eta osasun zentroetako langileak.
Jarraian, hainbat lan talde osatuko dira menpekotasunen arlo desberdinak jorratzeko: Familia eta heziketa arloa, Komunitate arloa, Aisia eta gazteria arloa, Gizarte eta Osasun arloa eta Lan arloa. Diagnostiko parte-hartzailea izango da, eragile anitzen ikuspegia eta iritzia jasoko baita.
Udala hasi da honezkero elkarrizketa batzuk gauzatzen. Asmoa lan taldeak irailean abiatzea eta diagnostikoaren ondorioak azaroan jakinaraztea da. Udalak Etorkintza Fundazioarekin lankidetzan egingo du diagnostiko hau. Ekimena Eusko Jaurlaritzaren Osasun Planaren testuinguru orokorraren baitan dago.