Ekainaren 7an egindako auzolan arrakastatsuaren ostean, SOS Laudioko Lamuza Parkeak beste deialdia zabaldu du hasitako helburuetan eragiteko. Horrela, putzuen, bankuen eta “Ponpeia”-ren garbiketari bultzada eman nahi diote plataformako kideek uztailaren 5ean.
Hitzordu horretan herritarren partaidetza eta laguntza espero du plataformak. Horretarako lamuza@sosparkea.com posta elektronikora bidali dezakete. Dagoeneko laudioar batzuek izena eman dute udalak kontratatzen duen asegurua erabiltzeko
“Ponpeia” deituriko gunean jarriko dute bereziki arreta auzolanean, uztailaren 12an beste ekimen bat prestatu baitute. Egun horretan parkearen erabilera kulturala sustatu nahi dute.
Horretarako kontzertua eta zinema emanaldia antolatu du plataformak. 21:00etan Igor Arzuaga musikariak kontzertua eskainiko du. Ilundu bezain laster pelikula laburrak emango dituzte “Ponpeia”-ko antzeztokian.
Printzipioz Laudioko zuzendariek egindako filmak izango dira protagonista. Kepa Sojok “Loco con ballesta”, bere azkenengo pelikula, estreinatu eta aurkeztuko du, adibidez.