Ekainaren 29an Jose Manuel Arza “Josito” omentzeko lasterketa antolatu du Laudio Atletismo Klubak. Aurtengoa bigarren edizioa izango da, eta 10 kilometroko ibilbidea izango du. Adierazi dutenez lurzoru lauan egingo dute.
Jose Manuel Arza 2012an hil zen, eta lasterketa honen bidez haren lagun eta lankideek atletismoaren bultzatzaile sutsua eta Spiuk eta Kon Sport marken sortzaile izan zena omendu nahi dute.
Aurten, berrikuntza gisa haurren lasterketa erantsi nahi izan diote ekimenari. Horregatik, maila eta distantzia ezberdinetako bideak prestatu dituzte. Hala, umeentzat hiru kategoria egono dira: 8-10 urtekoena, 11-13 artekoena eta “txupeteen lasterketa”. Azken horretan 300 metroko bidea egin beharko dute partaideek.
Senior eta beteranoen bi maila ere egongo dira; 40 urte baino gehiago dutenentzat eta 50 urtetik gorakoentzat. Izen ematea eta probari buruzko informazio zehatza www.konsports.com webgunean dago eskura. Dena dela, posta elektronikoa nahiago duenak atletismoaldio@euskalnet.net helbidean apuntatzeko aukera izango du.
Antolatzaileek azaldu dutenez, probak ez dira lehiaketarako puntuagarriak. Parte hartzen duten pertsona guztiei opari bat emango zaie oroigarri gisa.