Udal-gobernuak azaldu du ez direla egia OMNIA udal-talde politikoak jaietako diru-laguntzen harira eginiko adierazpenak. OMNIAk prentsa ohar batean salatu zuen urte honetarako ez daudela elkarteentzako diru-laguntzak bermaturik, diru-laguntzen oinarri estrategikoen baitan konkurrentzia askeko diru-laguntzak emateko irizpideak onartzeke daudelako. Horregatik, jada ospatu diren jaien antolatzaileei ezingo zaizkie diru-laguntzak eman, “ez bada onartuko diren irizpide horien baitan hori bermatzen”, OMNIAko ziengotzi den Nere Gonzalezen hitzetan.
Udal-gobernutik ziurtatu dute onartuko diren irizpideek hori bermatuko dutela, eta adierazi dute ez dutela ulertzen “OMNIAk nondik atera duen diru-laguntzak emango ez direnaren ideia”.
Gonzalezek, baina, salatu du jada egin diren jaien antolatzaileei diru-laguntzak automatikoki ematen bazaizkie konkurrentzia askea albo batera uzten dela, konkurrentzia askeak “nahi duen herritar orok” bere jaietarako proiektua aurkeztea eta gero udalak irizpide batzuen baitan proiektu egokiena hautatzea ekarriko lukeelako. Zinegotziak gaineratu du irizpideak onartzen direnean hori bermatu ahalko dela. Horregatik, irizpide horiek lehenago onartu ez izana deitoratu du.