JOSU GARAIO (Laudio, 1992) hockey jokalaria da Ganbegin eta horretaz gain Hockey Egunaren antolatzaileetariko bat da. Larunbatean ospatuko den kirol jaiak 300 pertsona inguru bildu ohi ditu urtero eta aurten ere arrakastatsua izatea espero dute.
Zein da Hockey egunaren asmoa?
Hockey eguna denboraldia amaitutzat emateko modu polita da, bertan adin ezberdinetako jokalariak batu eta ondo pasatzeko.
Gardean giro ederra sortzen da, hockey partiduak, txikientzako tailerrak, bazkaria... Gainera jokalari nagusi eta txikien arteko harremana errotzeko modu ona da, txikiek hockeyak duen ibilbidea ikus dezaten.
Zer ekintza mota antolatu dituzue eta nortzuk antolatzen dituzue?
Adin guztietako jokalariek disfruta dezaten ekintzak antolatzen ditugu egun honetan. Txikienek hockey partiduak jolastu, mota ezberdinetako tailerrak egin eta egunean zehar antolaturiko jolasetan parte hartzeko aukera dute.
Nagusientzako berriz, jokalari ohien partiduak antolatzen dira, argazki erakusketa eta denboraldian zehar gertatutakoa komentatzeko aukera izaten da eguerdiko bazkarian.
Zerk egiten du Hockey egunaren giroa berezia?
Esan dudan moduan, adin ezberdinetako jokalarien arteko harreman horrek egiten du giroa berezi. Jende asko biltzen gara hockeyaren inguruan egun honetan, jai giroa sortzen da Gardean eta jendeak oso pozik amaitzen du eguna.
Zergatik uste duzu dagoela errotuta hockeya Laudion?
Hockeyak urte asko daramatza Laudion bueltaka, asko dira kirol honetan parte hartu duten lagunak. Nire ustez, hauek dira Hockeyaren arrakastaren errudunak Laudion. Urteetan borrokatu diren laguntzak eta baliabideak dira gaur egun hockeyari indar hori ematen diotenak.
Zer da beharrezkoa hockey taldean parte hartzeko?
Hockey Talde batean parte hartzeko ez da inolako gaitasun berezirik behar, kirolaz gozatzeko gogoekin nahikoa da.
Adin guztietako taldeak ditugu Laudion bertan eta oso erraza da hockeyaren munduan sartzea ikastetxe edo talde nagusiaren bitartez. Hemendik apuntatzeko animoak luzatzen diot hockeya ezagutu nahi duen orori.