Laudioko Udalaren gazteria arloak herriko 16 eta 35 urte bitarteko gazteei zuzendutako graffiti edo horma-irudi lehiaketa jarri du abian. Iazko udan antolatutako “Mila kolore” tailerraren bidez hiri-artea sustatzeko abiatutako ekimenari helduz, herriko 4 hormatan muralak egiteko aukera izango dute irabazleek.
Aurkeztutako lanek Laudiorekin zerikusia izan beharko dute, herriko jaietako elementu adierazgarriekin edo pertsonaiekin esaterako. Ez dira onartuko ordea alderdikoiak, lotsagabeak, lizunak, xenofoboak, sexistak edo pertsonen duintasunaren edota giza eskubideen aurkakoak jo daitezkeenak.
Margotuko diren hormen kokapena udal web-gunean iragarriko dira datozen egunetan. Hormatarako zirriborroak A3 tamainan aurkeztu beharko dituzte lehiakideek, erabiliko diren materialen zerrenda lagunduta. Horma bakoitzeko gehienez zirriborro bi aurkeztu ahal izango dira.
Proiektuak aurkezteko epea ekainaren 2tik 30a bitartean egongo da zabalik eta epaimahaiak uztailaren 8an emango ditu ezagutzera proiektu irabazleak. Lehiaketa arautuko duten oinarriak eta gainerako dokumentazioa udalaren web-gunean eskura daiteke.
Horma-irudiak uztailaren 11tik 20ra bitartean burutuko dira eta udalak beharrezko material guztia jarriko du irabazleen eskura. Gazteria zerbitzuko telefonoan, 944034850, eta educacion@laudiokoudala.net posta elektronikoan lehiaketaren inguruko argibide eskaerak erantzungo dituzte.