Omniak hileroko biltzar bihurtuko ditu orain arte asterokoak ziren bilerak.
Helburua parte hartu nahi duten herritarren asistentzia bultzatzea da. Bilera horietan udal gaien inguruan informazioa banatu eta Omnia eta gainontzeko talde politikoen mozioak eztabaidatu eta bozkatuko dira. Omniak www.omnia.ikune.org bere parte-hartze plataforman argitaratu ezin diren mozioen kontra bozkatuko du beti, gai baten inguruan informazio nahikoa ez dagoenean hura bozkatzea ez baitu bideragarri ikusten.
Biltzar hauetako lehena gaur, astelehena, izango da, arratsaldeko 19:00etan, Oketa Kalean kokatuta dagoen Omniaren egoitzan. Bertan hileroko bilera horien funtzionamendua azaldu eta maiatzaren 26ko udalbatzan eztabaidatuko diren mozioak bozkatuko dira.
Bestalde Omniak Laudioko aurrekontua benetako aurrekontu parte-hartzailea ez dela salatu du. Taldearen ustez, herritarrek beren ekarpenak emateko zabaldu zen epea laburregia izan zen eta Udalak aurrekontuen edukia azaltzeko deitu duen biltzarra ere publizitate estrategia hutsa izan da.
Omniaren ustez aurrekontua udal batek duen tresna garrantzitsuena da eta beste herri batzuetan frogatu diren parte-hartzerako sistemak martxan jarri behar lituzke Laudioko Udalak.