Iragan maiatzaren 3ko gauean Laudioko Gaztetxean lapurtzera sartu zirela salatu du Laudioko Gazte Asanbladak. Asanbladako kideek adierazi dute gau hartan ezezagun batzuek Gaztetxeko eszenatokiko albo bateko atearen kristala hautsi, Gaztetxera sartu, eta alkoholdun botiletan 100 euro inguru eraman zituztela.
Gazte Asanbladatik azpimarratu dute ez dela lehen kasua izan, azken urtean zazpi aldiz sartu baitira Gaztetxera. “Lehenengoa Urduñan Gazte Danbada jaialdia ospatu bitartean izan zen; eta ordutik hona beste hainbat erasorekin kalte larriak sortu dizkiote Gaztetxeari, herriko jaiak eta antzeko festa eta ekintzak aprobetxatuz”, adierazi dute.
Asanbladatik azaldu dute erasoetan “Gazte Asanbladaren zein Gaztetxeko beste eragileen materiala eta dirua” lapurtu dutela, bai eta “asanbladako kideen objektu pertsonalak” ere. Eraso horiek 3000 euro inguruko kalte ekonomikoa sortu dute, asanbladako kideen esanetan. Hortaz gain, gaineratu dute azken hiru erasoak “era berdintsuan” izan direla: “Gaztetxera sartu direnak modus operandi bera jarraitu dute: kristala apurtu eta alkohol botilak lapurtu dituzte”.
Horren guztiaren aurrean, Gazte Asanbladatik adierazi dute halako erasoak jasotzea “onartezina” dela eta, “erasoak eraso”, Gazte Asanbladak eta Gaztetxean euren jardunarekin jarraituko dutela.