Athletic Club-eko Fundazioak, kalean jokatzen zen futbolaren mamia berreskuratu nahi du eta horretarako Bizkaiko herri ezberdinetan jolastuko den Futbol Kalean txapelketa antolatu du, Laudiotik ere igaroko dena.
Maiatzaren 11n egongo dira Laudioko Aldai Plazan, goizeko 11:00etatik arratsaldeko 14:00ak arte. Ekainaren 15ean jokatuko dira finalerdiak Getxoko Ereagako hondartzan eta hilabete bereko 22an finala izango da Lezaman.
Txapelketan parte hartzeko izena eman beharko da telefonoz, web orriaren bidez edo egunean bertan, partiduak jokatzen diren lekuan. Kimuak (2002-2003 urteetan jaiotakoak) edo Benjaminak (2004-2005 urteetan jaiotakoak) izan beharko dira, bai neskak zein mutilak eta dokumentu ofiziala eskatuko zaie adina egiaztatzeko.
Araudia
Herri bakoitzean txapelketa bat egongo da, eta toki bakoitzean zelaia aldakorra izan daiteke, beti ere erreferentzia 30x20 metrokoa izanik, 2 metroko ateekin. Lau jokalarik osatuko dute talde bakoitza, atezainik gabe. Eta partidu bakoitzak 10-15 minutu iraungo du, txapelketa sistema, parte hartzaileen arabera aldatu daitekeelarik.
Talde irabazlea eta antolakuntzak aukeratutakoa, fair play eta Athletic-en baloreak kontuan hartuta, beste fasera pasatuko dira futbol 7-ko talde bat bezala, bere herria ordezkatuz. Epailerik ez da egongo beraz, jokalariek arautuko dute partidua.