Migrazio prozesua dela eta, kultura, hizkuntza eta ohitura ezberdinetako herritarrak elkarbizi dira eta batzuetan, zaila egiten da elkarren arteko harreman normalizatuak ezartzea Laudion.
Hori dela eta, elkarteek kultura guztiak elkartzeko lan handia egin arren, badira oraindik ekitaldi horietan parte hartzen ez duten etniak.
Horregatik, Kulturarteko Zubiak eta SEADen (Saharako Errepublika Arabiar Demokratikoa) Lagunen Elkarteak munduko herri eta kultura guztiekiko elkartasuna adierazi nahi dute, eta gonbidapena luzatzen diete etorkizunean haiekin elkarlanean aritzeko.
Antolatzaileen hitzetan, "norbanako eta herri gisa aberasteko pentsamendu eta ikuspuntu anitzez osatu nahi dugu Euskal Herria". Horregatik, maiatzaren 9tik 11ra antolatu duten egitarauan parte hartzeko gonbidapena luzatu nahi diote herritar orori.
Egitaraua
-
Maiatzak 9, ostirala, 19:00etan: Migrazioaren inguruko hitzaldia Balio Anitzeko gelan, Jose Angel Cuerdaren eskutik.
-
Maiatzak 10, larunbata, 18:00etan: Artisautza, folklore eta gastronomia erakusketa Aldai plazan. Honako herriek parte hartuko dute: Nigeria, Maroko, Senegal, Paraguay, Brasil, Mendebaldeko Sahara, Pakistan, Kuba, Bolivia, Nikaragua, India eta Euskal Herria.
Ekitaldiari txalaparta eta trikitixarekin emango zaio hasiera, eta ondoren honako dantza eta musika ikuskizunak izango dira:
- Senegal: King Milkone kantaria, Sapali perkusio taldea eta Biboy Sergio Bati akrobazia dantzaria.
- Maroko: Nabil kantaria.
- Paraguay: dantza herrikoiak.
- Brasil: dantza herrikoiak.
- Sahara: dantza eta musika herrikoiak.
- Euskal Herria: Untzueta Dantza Taldea, Fi ta Fik musika taldea eta Aretako trikitilariak.
-
Maiatzak 11, igandea, 19:00etan: "14 kilometro" pelikularen emanaldia eta zineforuma Udal Lanbide Heziketa Eskolan.