Otsailean zabaldu zuten Arrañoko auzokideek “Gaztelua” konpontzeko asmoa auzolanaren eta Udalaren laguntzaren bitartez. Dagoeneko lanak hasi dituzte eta eraikinaren inguruak garbitu eta txukundu dituzte.
Horretaz gain, udal makinak erabiliz, sarrera berria egin dute, jendea hesira igo ez dadin “Gazteluan” sartzeko.
Itoginak eta egituran dituen kalteen ondorioz udal teknikariek finkatu behar dituzte zein izango diren hurrengo urratsak, gehienbat eraikinaren egiturara begira.
Momentuz, inguruak egokitzen, irisgarritasuna lantzen eta obra-hondakinak aterako dituzte auzokideek. Bestalde, udal taldeek diru saila bideratu dute aurten -20.000 euro- aurrekontuen bidez, laguntza teknikoa izan dezaten Arrañoko bizilagunek.
Gainera, Udalak segurtasun plana eta asegurua bermatu ditu lanetan.
Gazteluaren ezaugarriak
Gazteluak 90 metro karratu inguru ditu. 30 metro karratuko bi gela angeluzuzen eta tamaina bereko patio batek osatzen dute.
Eraikina XIX. mendekoa da eta Urquijo Markesak agindu zuen egitea. Lamuza Parkearen zati bat da, nahiz eta Arrañon egon.
70. hamarkadan Urquijo sendiak parkea saldu zuenean Foru Aldundiaren esku geratu zen Gaztelua. Gero, Ñorrala koadrilak noizbait erabili zuen eta urtebetzeak ere ospatu ziren bertan, baina ezezagunek emandako erabileraren ondorioz -lo egiteko, adibidez- suteak gertatu ziren. Hori dela eta eraikina itxi zuten erakundeek.
Bestalde, eraikinak dorre bat zuen baina bota zuten arriskuak ekiditeko -umeak ere sartzen baitziren-.