Azkenean Aiala Vidrioko langileek ez diote greba mugagabeari ekingo. Igandean -apirilak 6- egindako asanbladan langileek bertan behera utzi zuten hurrengo egunetik aurrera greba mugagabea egiteko erabakia.
Iragan asteko ostegunean hartu zuten erabaki hori, “enpresaren aldetik inolako mugimendurik ez zegoela ikusten zelako”, azaldu du enpresako LAB sindikatuko ordezkaria den Asier Barruetabeñak.
Lan-hitzarmen kolektiboaren aldeko borrokan murgilduak daude Aiala Vidrioko langileak, eta jada bi lanuzte egin dituzte zuzendaritzak ezarri nahi dituen lan-baldintzen aurka. Greba mugagabea zen hurrengo pausoa, baina ostiralean bilera egin zuten langileen ordezkariek eta zuzendaritzak, zeinetan azkenak planteamendu berri bat proposatu zuten.
Ordezkariek gainontzeko langileei planteamendu berria helarazteko konpromisoa hartu eta hala egin zuten igandeko bileran. “Deialdia modu egokian egiteko bermerik egon ez zen arren”, langileen gehiengoa bertaratu zela azpimarratu du Barruetabeñak. Bilera horretan erabaki zen greba bertan behera uztea eta enpresarekin negoziatzen jartzea.
Bermeak
Greba albo batera utzi duten arren, enpresaren aurrean berme batzuk dituztela azaldu du Barruetabeñak. Hala, greba amaierako dokumentu bat egingo dutela adierazi du, “orain arte lortutakoa ziurtatzeko”.
Honako hauek dira lortu dituzten gauzak: ordu gehiago ez sartzea, lan erreformari aurre egiteko puntu batzuk sartzea, kaleratzeko aitzakiak desaktibatzea eta kaleratze bidegabeen kasuetan 45 eguneko akordioa, besteak beste.
Hala ere Barruetabeñak gaineratu du horrek ez duela esan nahi horrekin konformatuko direnik, “Hau guztia luzerako doa”, adierazi du.