Iragan otsailaren 26an Arabako Lurralde Historikoko Aldizkari Ofizialean jakinarazi izan zenez Foru Aldundiak probintzia bizkarrezurtzen duten autobus-lineak aldatu nahi ditu. Koldo Zabala Laudioko Udaleko bozeramaileak adierazi duenez berrogei bat izan dira gure herriko erabiltzaileen aldetik jaso izan diren proposamenak Aldundiak planteaturiko berrikuntzen aurrean. Gainera, proposamenok eta eskaerok beteak izan daitezen Udalak helegitea jarriko duela jakinarazi du Zabalak.
Laudio eta Gasteiz lotzen dituen autobus-linearen erabiltzaileek adierazi izan dituzten kexuen eta proposamenen artean honakoak aipa ditzakegu: bidea luzeegia dela, geltoki gehiegirekin, eta ondorioz zuzeneko bidaia gehiago beharrezkoak direla; asteburuan zehar dauden autobusak oso eskasak izan eta gehiago behar direla; ez dadila 7:45etako busa erretiratu lanera eta ikastera doan jende askok erabiltzen baitu...
Laudion bizi diren gasteiztarrek ere Gasteizerako 15:00etako busa mantentzea eskatzen dute, ordu horretan itzultzen baitira etxera bazkaltzera.
Bestalde, Okondoko bizilagunek sinadura bilketa bat jarri dute martxan euren herria Gasteizekin lotzen duen linea hori gal ez dadin.
Azkenik, kontuan hartu beharrekoa da Foru Aldundiaren asmoa Gasteizen geltoki bakar bat finkatzea dela. Zabalak jakinarazi duenez honek arazo bat ekarriko lieke hiriburuan lan eta ikasten duten laudiarrei, euren lantegietaraino eta unibertsitateraino distantzia luze bat zeharkatu beharko luketelako. Aldundiari orain arteko lau geltokitako sistema mantentzea eskatu dio.