Iaz greban izan ziren Laudioko Guardian beira lantegiko langileak, baina gatazka garaia atzean geratu dela dirudi enpresako zuzendaritza berria langileekin negoziatzeko prest agertu baita.
Gauzak hala, iragan urteko mobilizazioak antolatu zituen Guardian Greban kolektiboak jasotako diru guztiarekin hainbat material erosi eta herriko hainbat elkarteri eman izan dizkio, erakutsitako laguntzaren esker onez.
Laguntza jasoko duten elkarteen artean ASASAM, Afades, Nomeolvides eta Laudioko Udaleko ongizate eta gizarte zerbitzuen arloa daude. Kolektibokoek Kirikiñori ere eskerrak eman nahi izan dizkiote, laguntza handia eskaini izan badiete ere ez dutelako ordainetan ezer jaso nahi izan.
Emandako materialen artean honakoak aurki daitezke: 2000 eurotan baloraturiko 20 000 pixoihal baino gehiago (12 paletan banatuak), 2500 eurotan baloraturiko 5 tona haurrentzako poteak eta esne (haur txikienentzako) eta, azkenik, beste 3000 euro gastatu dituzte hainbat janari mota eskuratuz: tomate frijitua, lekak, latetan sarturiko janariak, azukrea, kakaoa…
Azkenik, kolektiboko kideek Guardian greban egon zen denbora guztian zehar laguntza eta babesa eman zieten elkarte, enpresa eta gizabanako guztiei eskerrik beroenak luzatu nahi izan dizkiete.