Udalak jakinarazi duenez, 2014ko aurrekontuen aurreproiektu definitiboa bukatuta dago. Egunotan gainontzeko talde politikoei helaraziko zaie. Ondoren, ogasun batzordera eramango da, azkenik, hilaren 31n, osoko bilkuran eztabaidatu eta onartua izateko.
Aurrekontuen proposamena otsailaren 20an egin zen. Ordutik igarotako hiru asteetan hala talde politikoek nola herritarrek, auzo asanbladen bitartez nahiz Bezeroaren Arreta Zerbitzuaz baliatuz, egindako ekarpenak jasotzeko baliatu dira.
Guztira 23.794.000 euroko inbertsioa aurreikusten da, pasa den urtean baino 172.430 euro gutxiago. Diru sarrerei dagokionez, enplegu programen nahiz laguntza sozialen handitzea eta diru laguntza guztiak mantentzeko esfortzua dira nabarmentzen direnak. Inbertsioetan, gainera, herritarrek egindako bi proposamen nagusi jaso dira. Alde batetik Arrañoko gazteluaren konponketa, eta, bestetik, SOS Laudioko Lamuza Parkea plataformak egindako eskakizuna.
Auzoei dagokionez, bakoitzean gutxienez interbentzio bat egitea bilatu da. Aretan garajearen eraispena eta irisgarritasun plana bermatuko dira; Ugarten plazaren egokitzea; Landaluzen barbara bihurgunea; Gardean asfalto konponketa lanak eta Santa Cruz-eko ermitaren mantenua; Latiorron eta erdigunean Plan forala; Erdigunean Zumalakarregi etorbideko iluminazioa eta Alberto Aceroko orubearen egokitzea; eta, bukatzeko, landa-eremuan Santa Luziara ur edangarria eraman eta Lusurbeilandarako bidearen hobekuntza. Horietan gain, ikasketa zentroetan, kirol-instalazioetan eta instalazio kultural eta sozialetan hobekuntzak aurreikusten dira.
Udaletik aurrekontuak onartzeko arazo handiegirik ez da espero, bidalitako ekarpen asko jasotzen dituztelako.