Langileek igandeko 22:00etatik astearteko 6:00etara egingo dute protesta, lan hitzarmena hilabeteteetan negoziatzen izan eta gero. Urtarrilan 32 orduko beste lanuzte bat egin zuten eta otsailerako greba mugagabea aurreikusita zegoen, baina bertan behera utzi zuten enpresaren zuzendaritzak bigarren negoziaketa bat abiatzeko gutxieneko baldintzak onartzen zituela ikusita.
Aste honetan zuzendaritzaren proposamen berria heldu da: %10 eta %15 bitarteko soldata murrizketa barne hartzen duen bost urterako hitzarmena. Langileen ordezkariak adierazi dutenez, ez daude prest soldata murrizketarik edo soldata eskala bikoitzarik onartzeko, ezta ordu gehiago lan egiteko ere, horregatik deitu dute lanuzte hau. Vidrala taldeak 50 milioko irabaziak izan zituen iaz eta langileen esanetan onartezina da egoera horretan halako proposamena aurkeztea.
Zuzendaritzaren proposamenean azaltzen den soldata igoera bakarra KPIari dagokiona da eta baja ekartzen duten istripuak lantegian zero izatea du baldintza bezala. Langileek, beirak eta beroak arrisku ugari sortarazten dutela eta baldintza hori betetzea ia ezinezkoa dela diote, iraupen gutxiko baja ekartzen duten 5 eta 10 istripu artean gertazen direlako urtero.
Langileen eskakizuna hurrengoa da: 2 urterako lan hitzarmena eta soldatak KPIa gehi puntu bat igotzea. Aparteko ordainsariak hilabeteko soldatarekin parekatzea, 45 eguneko kalte ordainak mantentzea eta bajak mutua bidez ez kudeatzea eskatzen dute ere.
Enpresa komiteak martxoaren 26rako zuzendaritzaren aldetik erantzun bat izatea espero du eta ez du greba mugagabea deitzea baztertzen.
Aiala Vidrio eskualdean dagoen lantegi garrantzitsuenetakoa da, 391 pertsonei lana ematen baitie. Vidrala taldeari dago lotuta eta Laudion enpresak dituen bulegotan beste 129 beharginek egiten dute lan.