Laudioko PSE-EE udal taldeak Zubiko Etxea, Gastronomia Museoaren egoitza izandako eraikina, Musika Etxea bilakatzeko proposamena balora dezala proposatu dio Bilduko Gobernu Taldeari.
Xede honi begira Musika bandaren entseguetarako egoitza eta elkartearen musika eskola bertora eramatea proposatu du PSE-EEk. Hortaz, Musika Bandako ordezkariekin biltzeko aukera aztertzeko gonbitea luzatu dio Bilduri.
Otsaileko udalbatzan gaiaz galdetuta, Zubiko Etxea hainbat elkartek bideratutako ekintzen egoitza bilakatu dela adierazi zion Natxo Urkixok Txaro Sarasuaren taldeari. Izan ere PSE-EEk udal instalazio hauek hainbat unetan libre daudela adierazi du eta ondorioz bideragarria deritzo musika bandaren jarduera bertora eramatea.
2012 urte amaieran itxi zen Gastronomia Museoa eta orduz geroztik ez da xede finkorik iragarri Zubiko Etxerako. Bitartean, San Roke musika banda 2004az geroztik, Lamuza parkeko musika etxea itxi zenetik, Gardea auzoko Juan XXIII ikastetxeko egoitzan egiten ditu entseguak eta musika eskolak. Honen harira, PSE-EEk musika bandako arduradunek hainbatetan herriaren erdigunetik gertuago den egoitza baten beharra jaso eta Bilduri luzatu dio.