Errefuxiatuen kanpamenduetara helduko da Saharako Elkartasun Karabana laster. Atzo 10:00etan agurtu zuten Laudion hainbat pertsonak. Haien artean eskualdean bizi diren saharar ugari zeuden, baina horiek ez ezik, tokiko erakundeek ere parte hartu zuten ekimenean.
Eusko Legebiltzarrean dauden talde politikoen ordezkari gisa Jone Berriozabal jeltzaleak babestu zuen egitasmoa. Mikel Lasa, Aiarako Kuadrillaren lehendakariak ere Saharako herriaren zapalkuntza egoera gogoratu zuen eta Koldo Zabala Bilduko zinegotziak modu berean Saharako autodeterminazio eskubidea aldarrikatu zuen.
Saharako Errepublikaren Lagunek eskertu zuten Aiarako erakundeek elkarlanerako erakutsitako borondatea.
Sahararren aldetik Polisarioko ordezkari batek hitz egin zuen agertutako hedabideen aurrean. Aukera aprobetxatu zuen azpimarratzeko Saharak sufritzen duen okupazioa eta gatazka ahaztuta bat dela gogoratzeko.
Nahiz eta hitza ez zuten hartu, Karabana agurtzera hurbildu zirenen artean ordezkari politiko gehiago zeuden, Okondoko alkatea Sergio Tato, Amurrioko alkatea Josune Irabien edo Juanma Ibarretxe Laudioko zinegotzia eta Amets Meaza Laudioko Alkate ordea.
Laudiotik abiatutako karabanak 200 tona elikagai utziko ditu errefuxiatuen kanpamenduetan. Kamioiak ez ezik, bi autobusek ere osatzen zuten karabana, Bilboko Udalak emandakoak hain zuzen ere.
Karabana joan bezain laster, Etawasol elkarteak jaia ospatu zuen Laudioko Aldai Plazan Saharako Errepublikaren aldarrikapena gogoratzeko, 1976ko otsailean.