Laudio Institutuko Comenius programa EAEko zein Estatuko Comenius programa onena izendatu dute. Proiektua Europar Batasunak babestutako programa da. Helburua Europako herrialde desberdinetako ikastetxeekin harremanak sustatu eta elkarrekin lanketa bat burutzea da. Duela 12 urte hasi ziren Laudio Institutuan Comenius programarekin. Gai ezberdinak landu dituzte: herritartasuna, gutxitutako hizkuntzak edo energia, kasu.
Comenius programaren helburua ikasleak ingelesez komunikatzera bultzatu -ekintzak ingelesez egiten dira- eta atzerriko kulturak eta bizimoduak ezagutzea dela adierazi dute Laudioko Institutuan koordinatzaile lanak egiten dituzten ingeleseko bi irakasleek.
Azken proiektuan jorratutako gaia energia izan da. Hala, Laudioko ikasleek elektrizitate, paper zein janari gastuaren inguruan lanketa bat egin zuten ikastetxean.
Ondoren, ikasle talde txiki batek atzerriko herrialde batera bidaiatu zuen beste ikasleekin datuak alderatu eta arazoei irtenbideak bilatzeko asmoz. Proiektuan Suedia, Portugal, Reunion irla eta Hungariako ikastetxeekin jarri dira harremanetan. Herrialde bakoitzera 6 ikasle ordezkari joaten badira ere, proiektuan zehar 100 ikaslek baino gehiago hartu dute parte Laudioko Institutuan. Lan boluntarioa da eta DBHko ikasle guztiek har dezakete parte.
Eusko Jaurlaritzak 2013ko azaroan Laudioko Institutuan garatzen den Comenius programa EAEko programa onena izendatu zuen. Urtarrilean Estatuko Comenius programa onenaren saria jaso dute. Irakasleak pozik eta harro agertu dira eta Institutuarentzat oso positibotzat jo dute.