Musika Etxean gertatutako erorketen ostean eta Lamuza Parkeko ondarearen degradazioaren ondorioz SOS Laudioko Lamuza Parkea plataforma sortu dute. Egindako bigarren bileran ere sentsibilitate politiko ezberdineko jende ugarik parte hartu dute. Plataformaren oinarriak zehazteaz gain, mobilizazioa prestatu dute.
Protesta otsailaren 6an, osteguna, izango da Lamuza Parkean eta martxa egingo dute bertatik. Ekimena 18:30ean hasi eta 19:00etan bukatuko da Herriko Plazan. Mobilizazioa egin eta gero beste egitasmo jarri nahi dituzte abian; jardunaldi batzuk parkeko ondare historiko eta botanikoa zabaltzeko herritarren artean eta sinadura bilketa fisikoa -ez digitala-.
SOS Laudioko Lamuza Parkeak hiru ideia nagusien inguruan sortu dute. Hain zuzen ere, hurrengoa eskatuko diote Arabako Foru Aldundiari:
- Lamuza Parkearen Plan Berezian jasotako larrialdiko esku-hartzea berehala gauzatzea eraikinak erori ez daitezen.
- Parkeko ondare historikoa, bereziki Musika Etxea eta Kasinoa, botako ez direla bermatzea eta bere mantenuan pausoak ematea.
- Parkeko ondare historikoa Laudioko herritarren erabilerarako izatea, bere behar soziokulturalak asetzeko.