Laudioko Abastos plaza eta bere ingurunea erreformatzeko obrak hasi ditu udalak. Hala jakinarazi du Koldo Zabala obra zinegotziak. Urteetan zehar merkatari zein erabiltzaileek egindako aldarrikapena izan da plazaren hobetzearena, Zabalaren arabera.
Hiru izango dira egingo diren hobekuntzak. Alde batetik, itogin eta hezetasunen arazoa konpontzeari ekingo zaio. Zabalak adierazi du “iragazgaiztasun akatsak” konpondu behar direla, eta horretarako plazaren goiko parteko baldosak altxatuko direla jakinarazi du, “azpian asfalto-oihal bat jartzeko”. Plazaren beheko parteko sabaia eta paretak ere moldatzen hasi dira. 50.000 euroko kostua izango du obrak. Zabalak gaineratu du azpiegitura elektrikoan ere egingo dituztela konponketak, plazaren argiztapena hobetzeko.
Behin paretak konponduta, mural bat margotzea da asmoa. Mural horretan merkatu baten hainbat elementu irudikatuko direla jakinarazi du Zabalak. Iragan uztailean muralismo tailerra antolatu duen enpresa berari esleitu zaio irudia egitearen lana, eta plazaren beste hainbat zonaldeetan hainbat marrazki errotulatzearena baita. 19.300 euroko aurrekontua izango dute horretarako.
Hirugarren hobekuntza Abastos plaza oinezkoentzako zonalde bilakatzera dago bideratua. Asfalto berria jarriko da eta hosto batzuen irudiekin apainduko da gero.
Merkatariekin bilerak
Obrak egiten hasi baino lehen plazako merkatariekin batzartu direla azpimarratu du Zabalak. Bilera horietan zehaztu dituzte “plaza hobetzeko egin beharreko obrarik garrantzitsuenak”. Zinegotziak gogorarazi du bazegoela plaza hobetzera bideratutako proiektu bat, milioi eta erdi euroko aurrekontuarekin. Baina gero gaineratu du ez dela posible gaur egun diru kopuru hori proiektu horretara bideratzea. Hala, aurreikusitako obrentzako 85272 euro erabiliko dira.