Herri eragileak eta Udala elkarlanean aritu dira, iazko polemikak gaindituta
Euskararen Egunak ehunka laudiar bildu zituen larunbatean baserritar jantziak soinean. Goizeko hamaika eta erdietatik gaueko ordu txikietara arte iraun zuen festak, Herri Bazkaria egunaren epizentroa izan bazen ere.
Egitarauan programatutako ekintzak alkatearen aukeraketaren antzezpenarekin hasi ziren. Lamuza parketik herriko plazara, alkatearen segizioa herriko kaleetatik paseatu zen zanpantzarren erritmopean. Behin plazara iritsita, alkatearen aukeraketa antzeztu zen.
Bazkaria institutuko frontoian egin zen, elizako portikoan ez baitziren pertsona guztiak kabitzen. Maialen Lujanbio eta Andoni Egañaren bertsoek giroa alaitu zuten mahaiak jasotzeko unea iritsi zen arte. Ondoren, herritarrek dantza plazan gerriak mugitu eta gorputzak izerditu zituzten, arratsaldeko seietatik aurrera.
Arratsaldeko zortzietan eman zitzaion hasiera egitarauaren azken puntuari: erromeriari. Hura bukatutakoan herritar bakoitzak jaia nahi zuen ordura arte luzatu zuen, askok gaueko ordu txikietara arte.
Aurtengo Euskararen Egunean herri eragileak udalarekin elkarlanean ibili dira, iaz sortutako gatazka gaindituz. 2010eko edizioan Jaien Koordinakundeak udalak antolatutako bazkaria boikotatu eta egitarau “alternatibo” bat osatu zuen.
Atxiloketak salatuz
Jaian parte hartu zutenek gogoan izan zituzten ostiralean Bilboko Kukutza gaztetxeko eraistean atxilotutako hiru laudiarrak (jada aske daudenak). Atxilotuei elkartasuna adierazteko, dozenaka herritar herriko plazan kontzentratu ziren Erasoen gainetik, gazteria aurrera! lemapean, erromeriari hasiera eman baino lehen.