Lamuza parkean egon dira Arabako Foru Aldundiko teknikariak. Parkean dagoen “Musika etxeak” erortzeko arriskua duen aztertzea izan da bisitaren xedea, eraikinaren hainbat zati alboan dagoen espaloira erori baitziren abenduan.
Hori gertatu eta gutxira, abenduaren 17an, udal-teknikariak bertaratu ziren eta eraikinaren egoeraren inguruko txostena egin zuten. Txosten hura Arabako Foru Aldundiari helarazi zitzaion gero. Izan ere, Foru Aldundia da “Musika etxearen” zein Lamuza parkeko eraikin gehienen jabea, Koldo Zabala Obra eta zerbitzuen zinegotziaren hitzetan. Gauzak hala, abenduaren 31an bildu zen udala ondasun diputatuarekin, zeinek adierazi zuen aldundiko teknikariak Lamuza parkera joango zirela egoeraren inguruko txosten bat egitera.
Txosten horren berri, baina, prentsaren bidez jaso dutela salatu du Zabalak. “Aldundiko arduradunekin harremanetan jarri ginen eta azaldu genien txostena lehenengoa jasotzen udala izan beharko zela. Beraiek esan ziguten ez dela behin-betiko txostena. Hori ikusita filtrazio bat egon da, nonbait”. Prentsan azaldu denaren arabera, aldundiaren txostenak “berehala hartu beharreko neurriak” daudela berresten du. Hala ere, prentsan azaldutakoak ondasun diputatuak bileran esandakoarekin bat ez datorrela azaldu du Zabalak, “diputazioa eraberritze lanak egiteko prest dagoela helarazi ziguten bileran”. Zinegotziak gaineratu du aldundiaren zein udal-taldeen arteko “elkarlana” beharrezkoa izango dela Musika Etxearen aferari aurre egiteko.
SOS Laudioko Parkearen bilera irekia
Musika etxeari gertatutakoa Lamuza Parkearen eta bertan dagoen ondare historikoaren gaineko eztabaida piztu du, sare sozialetan batez ere. SOS Laudioko Lamuza Parkea orria sortu du herritar talde batek Facebooken, eta sinadura bilketa bati ere ekin diote Change.org webgunearen bidez, aldundiari parkeko eraikinak eraberritzea eskatzeko. Hortaz gain, bilera ireki bat egiteko asmoa dute bihar, 18:30ean, Laudioko Kultur Etxean. Gaian interesa duen herritar oro bertaratzeko deia zabaldu dute.