Arabako Merkataritza Ganberak Arza eraikinean duen egoitzaren funtzionamendua ahalbidetzen duen hitzarmena luzatuko du Laudioko Udalak, hala iragarri berri du Iñigo Martinez Cerrillok, funtzio publikorako zinegotziak.
Bost urtetako jarduna bildu du dagoeneko Laudioko Merkataritza Ganberaren egoitzak europar eremutik jasotako diru-laguntza bateri esker. Hasierako finantzazio bide hori agortuta, urtebeteko luzapena izenpetuko dute aurki ganberak eta Udalak. Hortaz, 16.000 euroko diru partida aurreikusi dute xede horrekin udal aurrekontuetan.
Ekintzaileen promoziorako tresna
“Legealdi hasieran ezarri genuen helburua lortu dugu, alegia, Arza eraikina sustapen ekonomikoaren tokiko egoitza bezala indartzea. Merkataritza Ganbera berton egoteak garatzen dugun lana bermatzen du, oso tresna baliagarria baita sustapen ekonomikorako ekimenak bideratzean, ekintzaileen promozioa kasu”, adierazi zuen Bilduko ordezkariak.
Datuei erreparatuta, 2012 urtean ekintzaileen eremuan aurkeztu diren 42 proiektuak eta 2013 urtean erregistratu diren 12ak azpimarratu zituen Iñigo Martinezek.
Gasteizko egoitza soziala eta prestakuntza eta aholkularitzako guneaz aparte, Arabako Merkataritza Ganberak Laudion eta Guardian beste bi egoitza ditu herrialdean gertuko aholkularitza bideratzeko.