URAk Nerbioi ibaia bideratzeko proiektu berria egingo du aurten. Gainera, agentziak iragarri du egitasmoak ahalik eta eragin gutxien izango duela etxebizitzetan.
Berlojatzen aurreko proiektuak kaltetzen zituen auzokideak batzen dituen elkartea da eta bere ustez herritarrek egindako mobilizazioen ondorioz jazo da URAren irizpide aldaketa. Hori dela eta proeiktua 500 urtera begira egin ordez, 100 urtera egingo da. Zentzu horretan, elkartearen bozeramaileek auzokideak zoriondu dituzte.
Lan diskretua
Gainera, Aretako eraikin arrosaren itxura hobetzeko egin duten lan isila goraipatu dute Berlojatzeneko kideek. Udalarekin elkarlanean aritu baitira etxearen inguruak konpontzeko. Haien aburuz, eraikina bota behar zutela iragarri zutenean etxearen ospea kaltetu zen eta azkenengo konponketei esker fama txar hori zuzendu dute neurri batean.
Orain, Berlojatzen elkarteko kideek espero dute proiektu berria ahalik eta lasterren idatz dezaten ordezkari guztien elkarlanaren bitartez, hurrengo udal hauteskundeak baino lehen. Ez bakarrik herritarren zalantzekin bukatzeko baizik eta inolako alderdirik erabili ez dezan bere mesederako “auzokideen lorpena izan dena”.