Euskararen erabilera normalizatzeko plan estrategikoa garatu du Udalak, euskara arloaren eskutik. Bost urtetarako plana da, 2013-2017 bitarte. Lehenengo urtea, legeak hala jasota, bere garapenerako eta aprobaziorako erabili da. Hasierako plana igaro berri den urtearen azken aurreko egunean onartu zen, hau da, abenduaren 30ean. Asteok aurkeztu eta ekarpenak egiteko baliatu dira, ondoren azkeneko dokumentua onartu arte. Hartarako, Eusko Jaurlaritzaren idatzizko oniritzia beharko dute, nahiz eta onartuko duela aurreratu.
Planak administrazioan euskararen erabileraren normalizazioa lortzea du helburu. Horretarako, lanpostuen araberako maila eskatuko zaie langileei. Ez da, ordea, muga minimoetara murriztuko. Izan ere, legearen arabera, herriko euskaldunen portzentaje berdina beteko dute administrazioko langile euskaldunek. Hau da; datuen arabera, egun, Laudioko %39a da euskaldun. Hortaz, udal langileen %39ak bete beharko ditu euskararen ezagutza maila minimoak. Muga gaindituta badago ere, %52ak betetzen baitu zehaztutako mailarekin, udaletik normalizazioan sakontzen jarraitzeko erabakia hartu dute.
Planaren helburua hizkuntza ofizial bien arteko aukera berdintasuna bermatzea izango da. Gainera, euskara gainontzeko administrazioekin erlazionatzeko hizkuntza bilakatu nahi dute, hala nola udal barneko lanerako hizkuntza ere. Horretarako, langileei kurtso desberdinak eskainiko zaizkie, euskalduntze prozesua jaso dezaten.
Aurrekariak
Planak euskararen normalizazioan administrazioetan hartutako neurrien jarraikortasuna bermatzen du. 1982an lehenengo aldiz euskararen normalkuntzarako oinarrizko legearen dekretua onartu zen. Horren arabera, herritarrei administrazio publikoekin aukeratzen zuten hizkuntza ofizialean erlazionatzeko eskubidea aitortzen zitzaien.
1989an onartutako lege berri baten arabera, lanpostuen arteko erlazioak zehazten ziren, langile euskaldunen minimo bat ziurtatuz. Dekreturik berriena 1997koa da. Bertan, bost urtetarako planifikazio epeak onartzen dira. Plan horiek neurriak ezarri behar dituzte euskararen erabilera administrazio lokaletan normalizatzeko prozesuan lagundu ahal izateko.
Azkeneko dekretu horri jarraiki garatu zen lehenengo euskararen plana, 2008an. Beraz, plan berria udalak garatzen duen bigarrena izango da.