Herritarrengandik hainbat kexa jaso izan ditu Udalak semaforoen soinu-ozentasuna edota jardun-ordutegia direla eta. Arazo hauek, batez ere, sistemaren aintzinatasunagatik ematen dira, duela bi hamarkada ezarri baitzen.
Koldo Zabala zinegotziak azaldu duenez, arazo hauek konpondu eta sistema berritzeko lehenengo pausua ONCEko teknikariekin harremanetan jartzea izan da, ikusmen arazoak dituztenen beharrak asetzeko egokienak diren sistemak zeintzuk diren jakiteko.
Sistemarik egokiena urrutiko aginte bidez aktibatzen den orientazio bidezko soinu-seinale teknologia da. Sistema honek urrutiko agite bidez funtzionatzen du, eta ONCEko afiliatuek semaforo batetik hurbil daudenean aktibatu dezakete aparatu batekin. Aparatu honek bi posizio dauzka: bat semaforo batetik hurbil dagoela ohartarazten diona, eta bestea, seinale bat igortzen duena semaforoa berde dagoenean soinua egin dezan.
Era honetan, ikusmen arazoak dituztenentzako abantaila izateaz gain, kutsadura akustikoa murrizten da, soinua beharrezkoa denean soilik ibiliko baita.
Sistema berri hau herriko gune ezberdinetako 32 semaforotan ezarriko da eta 11.281€-ko gastua izango du. Udalak beregain hartuko du gastu hauen ordainketa. Hala ere, Eusko Jaurlaritzako Enplegu eta Gizarte Politika Sailari diru-laguntza eskatu dio, inbertsio horren parte bat errekuperatu ahal izateko.