Euskal antzerkia sustatzeko Zubi ekimenaren lehen estreinaldia da Konpota, eta obra Pablo Ibarluzea klown eta aktoreak (Laudio, 1980) zuzendu du. Testua Philippe Gaulie maisuarena da, eta ordu eta erdi inguruko bakarrizketan datza. Hain zuzen, Eneritz Artetxek emakumeek historian zehar eduki duten rolari buruz hausnartzen du, umorea, tragedia eta zenbait errezeta tartekatuz.
Estreinaldia Durangoko Azokaren Szenatokia ekimenaren barruan egingo da, igande honetan, abenduak 8, 19:00etan, herri horretako San Agustin kulturgunean.
Pablo Ibarluzeak aiaraldea.com-i adierazi dio, aurretik ere ibilia dela zuzendari-lanetan. Dena den, zehaztu du obra hau berezia izan dela, oraingoan aurretik idatzita zegoen testu bat zuzendu duelako lehendabizikoz.
Zubi egitasmoaz galdetuta, zera azaldu digu: “Zubi proiektua orain bi urte sortu zuten Euskal Herriko zenbait konpainiek eta programatzaileek, hala Hegoaldekoek nola Iparraldekoek. Haren helburua da euskaraz lan egiten duen artista baten proiektu berezi bat aukeratzea bi urtean behin, eta proiektu hori diruz laguntzea eta programatzea.”
Aukeratutako lehenengo obra, beraz, Eneritz Artetxek aurkeztutakoa izan da: Konpota. Obraren zuzendaria izatera nola iritsi den galdetu diogu Pablo Ibarluzeari, eta erantzun digu Artetxek eta berak aspalditik ezagutzen dutela elkar. Biak izan dira Philippe Gaulier antzerki-maisuaren ikasleak Parisen, eta Eneritzek esana zion Pablori bere obra aukeratuz gero, Pablo berak zuzenduko zuela. Esan eta egin.