Laudioko ikastetxeetako sarrera-irteera bideetan segurtasuna bermatzeko plana abiatu du Udaltzaingoak. Eskoletan sartzeko eta irteteko orduak “bide segurtasunerako benetako arrisku egoera” bilakatu dira, Udaltzaingoaren Buruzagitzaren arabera, hainbeste auto leku berean mugitzeak aparkatzeko arazoak eta maniobrak behar bezala ez egitea dakarrelako. Egun hauetako eguraldi txarra gehitu behar zaio horri, “erregulatu ezinezko auto pilaketak” sortzen dituelako, Buruzagitzaren hitzetan.
“Kontrol zorrotzak”
Horregatik, ikastetxeetara joateko autoa “ezinbesteko kasuetan” soilik erabiltzea eskatu du Udaltzaingoak, eta “trafiko kontrol zorrotzak” egingo dituztela gaineratu du, “egin behar ez diren aparkamendu eta maniobrak saihesteko”. Bidea oztopatzea edo espaloiaren gainean aparkatzea eta biratze arriskutsuak egitea ekiditea da asmoa. Adingabeek Haurrak Eusteko Sistemen derrigorrezko erabilera egiten duten ere gainbegiratuko dute poliziek, eta arau hausleei salaketa jartzera iritsi daitezkeela ohartarazi dute.
Hortaz gain, punturik arriskutsuenak bezala identifikatzen dituzten lekuetara bertaratuko dira udaltzain patruilak, trafikoa erregulatu ahal izateko.
Planteamendu zabala
Udalak adierazi du hori izango dela planteamendu orokor bat gauzatzeko lehen urratsa. Planteamendu horren azkenengo helburua da gurasoek autoa ez erabiltzea umeak Laudioko ikastetxeetara eramateko. Koldo Zabalak azaldu du arriskuak saihesteko eta herriaren jasangarritasuna hobetzera bideratuko dituztela ahaleginak. Kanpaina hurrengo urtearen hasieran abiatuko da ziurrenik eta zinegotziaren iritziz "hezkuntza hartu behar du ardatz gisa".