76 dira euskara erabiltzeko konpromisoa Laudioko Udalarekin sinatzera animatu diren herriko denda, taberna eta enpresa txikiak. Laudioko merkatari, ostalari eta zerbitzu-enpresarientzako euskara planaren baitan sinatu dute akordioa. Horrela, sinatzaile bakoitzak konpromiso maila bat hartuko du euskararekiko.
Hiru dira zehaztu diren konpromiso mailak. “Oinarrizko konpromisoa” hartu duten denda, taberna eta enpresek ondorengo elementuak euskara hutsez edo elebitan izan beharko dituzte: jendaurreko errotulazio guztia (kanpokoa zein barrukoa), publizitatea eta kanpo eta barne erabilerarako elementuak (logotipoa, zigilua, gutun azalak, zozketak etbr.). Bezeroekin hitz egiterako orduan lehen eta azken hitzak (“Kaixo”, “Agur” eta antzekoak) euskaraz esateko konpromisoa ere hartu beharko dute. Parte hartzaile gehienek (44) konpromiso maila hau hartzera mugatu dira.
Konpromiso maila “ertaina“ hartu dutenek, arestian aipatutako guztia egiteaz gain, bezeroengana euskaraz zuzenduko dira eta erakundeekiko ahozko eta idatzizko harremanak euskaraz edo euskaraz eta gaztelaniaz egingo dituzte. 33 dira konpromiso maila honetara iritsi diren denda, taberna eta enpresak.
Konpromiso maila “gorena”, aldiz, bik baino ez dute hartu: Antze Ikastegiak eta Hitz logopediak. Maila horrek bere egiten ditu aurreko bi mailen betebeharrak, eta honakoak gaineratzen ditu: langileekiko ahozko harremanak euskaraz izatea eta idatzizkoak euskaraz edo euskaraz eta gaztelaniaz izatea. Langile berriak kontratatzean euskaradunak izaten saiatzea ere eskatzen da eta langileek euskara ikas dezaten erraztasunak ematea.
Bi urteko iraupena izango dute sinatutako hitzarmenek, eta hemendik sei hilabetera berrikusiko dira, betetzen diren ikusteko. Baina euskara plana ez da 76 parte hartzaileetan geratu nahi. Urtarriletik aurrera parte hartzaile gehiago bilatzea da asmoa, “erdigunetik harago, auzoetan” dauden denda, taberna eta enpresen artean.